Bayani mathematics
Opisyal na: si Defense Secretary Gilbert Teodoro ang kandidato ng Lakas-Kampi-CMD, ang partido ng administrasyon ni Gloria Arroyo.
Iisa lang ang nagpresinta na gustong magkandidato na bise president- si Interior Secretary Ronaldo Puno. Kaya Teodoro-Puno ang magiging tiket ng administrasyon.
Sa paghirang ng kandidatura ni Teodoro para president sa 2010 na eleksyon, malabo na si Bise Presidente Noli de Castro na tatakbo. Baka bumalik na lang siguro siya sa pagka-brodkaster.
May balita na baka raw mag-endorso si De Castro kay Noynoy Aquino. Ano yun, tumatalon na sa lumulubog na barko ni Arroyo si De Castro?
Sa mga survey kulelat si Teodoro. Point 2 per cent. May decimal point yan.
Noong Martes nga, sinabi ni Bayani Fernando,chairman ng Metropolitan Manila Development Authority na siyang ka-kumpetensya ni Teodoro sa nominasyun ng Lakas, na mas malaki ang tsansa niyang manalo sa 2010 eleksyun kasi apat na posyento raw ang nakuha niya sa mga survey.
Kapag pa-andarin daw ang makinarya ng Lakas-Kampi-CMD, mag-mumultiply daw limang beses ang kanyang mahihilang boto. Kaya magiging 20 per cent na siya. Mga sampung milyun na boto raw yun. Kaya pwedeng siya na ang panalo dahil si Fidel ramos noon, ganun din lang ang nakuha niyang boto.
Si Teodoro naman, sabi ni Fernando, ay minus two per cent. Kahit daw i-multiply mo pa ng lima, one per cent pa rin lang ang mahihila niya.
Ngunit hind nawawalan ng pag-asa ang mga data ni Arroyo. Maari pa rin daw mananalo si Teodoro dahil sa “makinarya” nila.
Ano ba ang gagawin ng makinarya? Gagawa ng boto?
At teka nga, di ba dapat mag-resign na si Teodoro sa kanyang pagka-defense secretary para hindi magamit ang kanyang opisina sa kanyang kandidatura?
Dahil si Sen. Noynoy Aquino ang nangunguna ngayon sa survey at siya ay kabilang sa oposisyun maganda ang anggulo na ang laban ay Cojuangco versus Cojuangco. Si Cory, ang nanay ni Noynoy, ay Cojuangco. Ang nanay rin ni Gilbert ay Cojuangco. Tiyo ni Gilbert ang negosyante na si Eduardo “Danding” Cojuangco.
Kaya laban na naman ng mayayaman. Ang pulitika kasi sa Pilipinas ay sobrang gastos. Para sa isang kandidato para president, kailangan may P3 bilyon ka. Kaya talagang ang mayayaman lang ang maaring kasali.
Wala namang masama sa mayaman. Kung sa maayos na paraan nai-pundar. Hindi sa pagnanakaw sa kaban ng bayan. At kung yun ay ginagamit para sa kabutihan ng karamihan.
Other articles: